Asturianu

El xuegu tien un papel mui importante nel desarrollu de cada persona, favoreciendo’l crecimientu, habilidaes mentales, afectives, sociales y físiques. Funciona como un mediu pa espresase y interiorizar conocimientos y capacidaes básiques pa les etapes siguientes de la vida.

XUGAR ye una actividá universal, xugóse, xuégase y va siguir xugándose, a toles edaes y en cualesquier cultura del mundu. Xugar apúrrenos espontaneidá, ayudanos a deprender faciendo, estimula les nuestres emociones, permitenos interrelacionanos y munchos beneficios más qu’hai que tener siempre presentes.

Xugar tamién ye una actitú esistencial, una manera de bregar cola vida y d’usar el maxín. Nos xuegos axúntense pensamientu, llinguax y fantasía.

Y xugar ye, amás, un DERECHU. Sí, sí, un derechu. L’artículu 31 de la Convención sobre los Derechos del Neñu y la Neña diz qu’esiste "el derechu del neñu y la neña al descansu y al espardimientu, al xuegu y a les actividaes recreatives propies de los sos años, amás d’a participar llibremente na vida cultural y nes artes".

Poro, güei más que nunca, vamos xugar, vamos pasalo bien, vamos deprender y vamos echar a andar el maxín.

Dende la Oficina queremos proponevos delles idees pa cellebrar esti Día del Xuegu:

- Un KAHOOT pa "Que nun te pesquen": una versión dixital d’esti xuegu de mesa de la Oficina de Normalización Llingüistica, pa que calquéis nella cuando y onde más vos preste, pa demostrar los vuestros conocimientos sobre cosines venceyaes cola mar y con Asturies.

- Una GUÍA DE RECURSOS con una recopilación de xuegos y recursos didáuticos n’asturianu, que podéis consultar equí.

- Un RETU: animámosvos a subir semeyes (nes nuestres redes sociales) de la vuestra infancia col xuegu o’l xuguete que más vos prestara daquella, y a que nos contéis un pocoñín por qué yera tan especial pa vós (tamién valen fotos de la reciella d’anguaño o de la familia xugando xunta, claro). P’abrir boca, dexámosvos con estes semeyes --> antigües qu’alcontramos na fototeca del Muséu del Pueblu d’Asturies, qu'agora puede consultase de baldre per Internet.

¡Que vos preste!