II Concursu Xixón Fala en 3
L’actu públicu de presentación de los temes va ser el sábadu 14 d’avientu nel Salón d’Actos del CCAI, a les 11.00 hores. El plazu de presentación de solicitúes pa participar nel concursu ábrese’l 5 de payares y remata’l 5 d’avientu de 2019 a les 00.00 h.
Van poder presentase a esti concursu persones mayores d’edá (nos apartaos A y B) y persones d’ente 14 y 18 años (nel apartáu C), con esplicaciones comunicatives curties d’estremáu calter y que respuendan al enfotu del concursu.
Los temes a tratar nel concursu van tener un rexistru cultu o académicu: hai que lu respetar y preparar el tema acordies con ello.
Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante.
No que cinca al públicu, ye una perbona manera d’abrir mires y d’averase a un conocimientu, anque seya esbozáu, de temes mui estremaos.
Los temes que se van presentar divídense en tres estayes:
A. Temes venceyaos a la cultura y la realidá asturiana (por exemplu: antropoloxía, toponimia, baille, historia, sociollingüística, reconversión industrial, nueves formes de turismu y perspeutives de futuru, etc.).
B. Temes de divulgación, non venceyaos únicamente a Asturies (por exemplu: vida intelixente n’otros planetes, homeopatía y pseudociencia, crianza con apegu, enerxíes renovables y cambiu climáticu, etc.).
C. La mocedá fala en 3: apartáu nel que les persones de 14 a 18 años (dambos incluyíos) pueden presentar temes tanto de cultura y realidá asturiana como de divulgación.
L’actu públicu de presentación de los temes va ser el sábadu 14 d’avientu nel Salón d’Actos del Centru de Cultura Antiguu Institutu (C/Xovellanos, 21), a les 11.00 hores.
El plazu de presentación de solicitúes pa participar nel concursu ábrese’l 5 de payares y remata’l 5 d’avientu de 2019 a les 00.00 h.
Les persones que quieran participar habrán presentar la solicitú de participación, formalizada d’alcuerdu con esti formulariu (https://acerca.gijon.es/sta/pages/utils/documentView.jsp?cud=12434140161736201722) nel Rexistru Electrónicu operativu les 24 hores del día, nel Rexistru de la Fundación Municipal de Cultura, Educación y Universidá Popular o na Rede Municipal d’Oficines d’Atención a la Ciudadanía del Conceyu de Xixón, amás de nos sitios conseñaos nel artículu 16.4 de la Llei 39/2015, de 1 d’ochobre del procedimientu alministrativu común de les alministraciones públiques (BOE 2/10/2015).
Van concedese tres premios en cada estaya: 1er premiu: 600 €, 2u premiu: 275 € y 3er premiu: 125 €.
Puedes consultar les bases nesti enllaz: https://llingua.gijon.es/multimedia_objects/download?object_type=document&object_id=247118
