Asturianu

El xueves día 25 d’abril, al rodiu de 400 moces y mozos de Xixón averáronse al asturianu dende una perspeutiva diferente, pa decatase que tamién hai que lu emplegar fuera del aula.

L'alumnáu participó nuna yinkana musical que tuvo compuesta por 10 pruebes y que cuntó cola participación d’artistes asturianos como Toli Morilla, Ruma Barbero, Delfo Valdés y Tori, David Varela y Xune Elipe.

Per otru llau, l’Asociación Cultural Esbilla entamó unos xuegos tradicionales asturianos, como’l tiru al palu, la rana, los aros, los zancos, los bolos, les carreres de panoyes o’l xuegu’l pañuelu.

Pa poner el ramu a los XVI Alcuentros, los distintos institutos participaron nun karaoke nel qu’interpretaron en comuña dellos cantares perconocíos de la música asturiana d’anguañu.