La mirada de Pipo Fernández nel FICX
"Pipo Fernández: Tuvi equí" ye'l títulu de la esposición que s'inaugura'l próximu xueves 14 de Payares nel Centru Cultural Caxastur Palaciu Revillaxixéu y tamién del nuevu llibru dedicáu al fotógrafu madrilanu, que recueye, en 208 páxines, bona parte de la so obra gráfica y un emotivu homenaxe de los sos amigos en forma de pequeñes dedicatories.
L'amuesa, que podrá visitase hasta'l 12 de Xineru, ye'l testimoniu d'una vida de película y películes, na que ficción y biografía, documentu y fantasía s'entemecen pa ilustrar el máxicu y siempre clisante mundu del cine. Pipo Fernández, testigu d'esceición, col güeyu educáu y curtíu en milenta y un festivales, estrenos, certames y batalles cinéfiles y cinéfagues de toa mena y condición, tien inmortalizao, ente les lluces y solombres del más esquisitu blanco y negro, o colos rellumentes colores d'una realidá que perpasa la ficción, a les más grandes figures del panorama cinematográficu mundial. El llibru, editáu pol FICX, va tar disponible dende'l próximu xueves 14 de Payares, a un preciu especial de 25 euros demientres les feches del Festival.
