Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Xixón llanza la so campaña nueva de publicidá turística pa seronda/iviernu

Votos

(Total de votos recibidos 24)

(Puntuación 3,00)

Xixon Tu Lugar
Xixón Turismu llanza una campaña publicitaria n’España y Francia col envís de desestacionalizar el turismu y atrayer turistes a la ciudá asturiana en temporada baxa. La campaña ta empobinada a potenciar les escapaes de fin de selmana y puentes y reforciar la imaxe de Xixón como destín cultural y gastronómicu.
Esti mes anició la campaña de publicidá de Xixón como destín turísticu enfocada a la temporada de seronda/iviernu. El mayor impautu de la campaña va realizase nos principales mercaos nacionales emisores de turistes a la ciudá asturiana (Madrid, Castiella y Llión, Euskadi, Galicia, Barcelona, Andalucía y Cantabria) y nes árees xeográfiques de Francia d’especial interés (Isla de Francia, Bretaña, Países del Loira, Centru-Valle del Loira, Nueva Aquitania, Occitania).

Esta campaña de seronda, que tien como principal oxetivu atrayer turistes acullá de los meses de temporada alta, completa la que se fixo en primavera y que tuvo como exa’l Xixón Romanu. La campaña ta empobinada a llegar a usuarios más allegaos y cualificaos per aciu de l’emplegu de soportes nuevos como la Smart TV o formatos nuevos como’l rich media.

La campaña publicitaria, que sigue emplegando l’eslogan “Xixón Tu lugar”, va centrase nun spot que s’espublizó güei y qu’amuesa los atractivos de Xixón so 5 estayes (“Vive”, “Siente”, “Saborguia”, “Conoz”, “Esfruta”), qu’engloben la ufierta turística de Xixón. Nesti casu, la campaña empobínase a pareyes que puean faer una escapada aprovechando los puentes de seronda y reforciando la imaxe de Xixón como destín cultural y gastronómicu.

Pa esparder la imaxe de Xixón van emplegase soportes online, d’esterior y revistes de viaxes, tanto na so versión impresa como online (Viajes National Geographic, Viajar, DeViajes y Conde Nast Traveler). Ente los soportes online, esbilláronse los qu’almiten el formatu vídeu: TV online, redes sociales (Facebook, Instagram y Youtube), revistes online y rich media. En Francia tamién s’incluyó’l portal meteorolóxicu La Chaine Météo y la rede social Snapchat, pola so fuerte penetración.

Amás de tener presencia en móvil, tableta y PC, añadióse’l dispositivu Smart TV a la planificación por mor del incrementu del emplegu ente los españoles (el medru mediu ye del 35% respeuto al añu 2018). Dientro d’esti dispositivu nuevu vamos faer campaña nes televisiones líderes, Mitele y Atresplayer, y en Youtube, plataforma de vídeu online líder. Con ello, ta previstu algamar un total de 8,4 millones d’impautos y cerca de 1,4 millones de spots vistos.

En publicidá esterior, que se va concentrar nel mes d’ochobre, van desendolcase les aiciones vinientes:
• Mupis n’estaciones de RENFE d’Euskadi, Galicia, Madrid y Barcelona
• Mupis dinámicos y estáticos nos tranvíes de Bilbao
• Gran Formatu en Santiago de Compostela, Valladolid, Barcelona y Madrid
• Mupis dixitales en Metro Madrid

A la campaña de seronda van sumase otres aiciones desendolcaes por Xixón Turismu, como’l patrociniu de ‘Amosando’ (conciertos de música asturiana que se distribuyen al traviés de les redes sociales) y de ‘La vuelta a la Península’, de Travelguau; la organización d’un blogtrip especializáu nel Xixón Romanu, un viaxe de prensa de la revista Conde Nast Traveler y un alcuentru con blogueros de viaxes en Barcelona; la presencia na Feria de Turismo de Interior (Intur) y l’alcuentru con turoperadores de la Red ETOA – European Tourism Association; y una campaña de publicidá n’Arqueotrip sobre "#GIJÓN ROMANO ¡Ven a descubrirlo!”.