Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Entamen les actividaes educatives de la Oficina de Normalización pal alumnáu de colexos ya institutos de Xixón

Votos

(Total de votos recibidos 73)

(Puntuación 2,95)

coles 18
La selmana qu’entra entamamos colos talleres y actividaes avezaos nos colexos ya institutos del conceyu de Xixón. L'actividá qu’abre esti cursu va ser Xixónpolis: el xuegu pa mercar Xixón.
Toles actividaes son de baldre, cuenten con monitores, material didáuticu y tresporte cuando ye preciso. Tienen siempre l’asturianu como llingua vehicular y son les que vienen darréu:

El xuegu de les pareyes (2u cursu d'Educación Infantil):

Taller onde se trabaya vocabulariu n’asturianu y castellanu (billingüe) de varies estayes: los animales, la cocina y los preseos de la mesa, el parque, los xuegos y los xuguetes, el tiempu atmosféricu, la ropa y el cuerpu humanu.

De la panoya al platu (3er cursu d'Educación Infantil):

Cenciellu taller de cocina nel que les y los participantes van ellaborar tortos dulces y salaos nuna plancha amás de llevar alantre una esfoyaza y distintos xuegos infantiles, cantares y bailles tradicionales asturianos venceyaos.

Qué cuentu tienes (Educación Primaria):

Esposiciones didáutiques itinerantes. Delles esposiciones de cuentos infantiles en llingua asturiana: Falar ensin parar, Pulgarina, Aquel viaxe estraordinariu (que camudó al home solitariu) y La neña de tres trences al revés, que s’empresten a los colexos demientres un mes.

Danciando tol añu (2u d'Educación Primaria):

Aniciu nel conocimientu y práutica de los bailles y dances tradicionales n'Asturies, conociendo los pasos más básicos y les estructures más simples, trabayando sobre too los bailles-xuegu y distintes manifestaciones coleutives, como les dances.

Xixón, una ciudá abierta a la mar (4u d'Educación Primaria):

Esta actividá consiste nuna salida pedagóxica que fai un percorríu per La Rula, Cimavilla, el Campu Valdés y el Muru que, mecíu con pruebes y xuegos a mou de yinkana, va averar a los escolinos y escolines a puntos fundamentales de la historia de Xixón y a la so relación cola mar.

Xixónpolis: el xuegu pa mercar Xixón(5u d'Educación Primaria):
Una actividá pa que los escolinos y escolines conozan, al traviés d'un xuegu, los barrios y distritos de la ciudá de Xixón.

Sol nos pomares: les migraciones güei y ayeri (1u y 2u ESO):
Al traviés de la obra lliteraria "Sol nos pomares" va trabayase col alumnáu'l contestu históricu de les migraciones de los sieglos XIX y XX, rellacionándoles coles d'anguaño y tentando de desaniciar prexuicios.

Visites guiaes a la Oficina de Normalización (1 erciclu d’ESO):

Visita guiada a les nueves instalaciones de la Oficina de Normalización Llingüística: nella vamos esplica-yos, in situ, qué ye esti serviciu, les posibilidaes qu’ufierta, pa que sirve y cómo se trabaya nél.

XVI ¡Saca la Llingua! Alcuentros de la mocedá cola llingua (Alumnáu d'ESO matriculáu n'asturianu):

Coles actividaes del proyeutu "Saca la llingua", basáu na participación del alumnáu y na tresversalidá de conteníos, preténdese que los mozos y moces participantes -matriculaos en llingua asturiana nos sos Centros- s'averen al asturianu dende un puntu de vista que nun seya'l puramente académicu.