Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Patrice Leconte va presidir el xuráu del Festival de Cine de Xixón

Votos

(Total de votos recibidos 122)

(Puntuación 2,99)

Patrice Leconte
Estrena nel FICX el so últimu trabayu "A promise" con Rebecca Hall, Alan Rickman y Richard Madden como protagonistes.
El renomáu direutor y guionista Patrice Leconte va ser ún de los grandes protagonistes de la viniente edición del Festival de Cine de Xixón. La cita xixonesa va contar col so talentu por partida doble, yá qu'amás de ser el presidente del xuráu va estrenar n'España'l so últimu trabayu, "A promise", un drama nos alboreceres de la Primer Guerra Mundial con un repartu de luxu: Rebecca Hall ("Vicky Cristina Barcelona"), Alan Rickman ("Harry Potter", "Sentíu y sensibilidá") y Richard Madden ("Xuegu de Tronos").

Esti aclamáu realizador francés ye conocíu pola audiencia española por trabayos como "L'home de la peluquera" o "L'arume de'Yvonne", pero son más de 30 títulos los que respuenden pola so carrera y la so proyeción internacional. Ganador de premios tan prestixosos como los BAFTA, Cesar y David de Donatello por otru de los sos grandes ésitos, "Ridicule. Naide nun ta a salvo", Patrice Leconte compitió en delles ocasiones pol máximu gallardón nos festivales más destacaos a nivel mundial. Cannes, Berlín y Venecia son namái dalgunes de les cites que se rindieron al so talentu, a les que podríamos añedir Karlovy Vary, Moscú, Cracovia, Taormina o n'el mesmu Festival de Xixón onde compitió l'añu pasáu con una película d'animación "El magacín de los suicides".

Nacíu en París en 1947 pero criáu en Tours, Patrice tornó a la capital 19 años más tarde pa estudiar cine al tiempu qu'empecipiaba la so carrera nel mundu del curtiumetraxe. Enantes de dirixir el so primer llargumetraxe en 1976, " Les vécés étaient fermés de l'intérieur", nel que yá contó con ún de los sos actores fetiche (Jean Rochefort), Patrice trabayó nuna de les revistes referentes del mundu cinematográficu ('Cahiers du cinema') y demientres 4 años, ente 1970 y 1974, como dibuxante pa la revista 'Pilote'. Foi en 1978 cuando dirixió'l so segundu llargumetraxe que lu llevó al estrellalgu: "Les bronzes", y que camudó nuna película de cultu del cine francés, una comedia que llogró un gran ésitu de crítica y públicu, de la qu'amás hubo dos secueles, en 1979 y en 2006, dambes dirixíes tamién por Patrice.

L'ésitu comercial, especialmente nel terrén de la comedia, dio a Leconte la posibilidá de dar el saltu internacional. En 1989, la so película "Monsieur Hire" foi escoyida pol Festival de Cannes y esto supunxo'l sofitu definitivu pa la so carrera. A partir d'esi momentu, el realizador francés fue combinando grandes proyeutos como "La moza de la ponte" o "L'home del tren" con otros de calter más independiente, creando pasu ente pasu una de les filmografíes que más rescamplen del cine francés.

La presidencia del xuráu de Patrice Leconte supón pal festival un gran valir cinematográficu y d'induldable proyeición internacional, premises básiques pal direutor del certame, Nachu Carballo.
El Festival Internacional de Cine de Xixón va facese del 15 al 23 de payares. Ta entamáu pol Teatru Xovellanos, patrocináu pol Ministeriu d'Educación, Cultura y Deporte, el Programa Media, el Principáu d'Asturies y Liberbank. Collabora Coca Cola.