Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

El FICX en Giffoni

Votos

(Total de votos recibidos 137)

(Puntuación 3,00)

Jorge Giffoni
Un añu más, el Festival Internacional de Cine de Xixón tien collaborao col Festival de Giffoni (Italia), al traviés de tres xóvenes xixoneses que fueron xuraos nesta edición 2013 (17-29 xunetu). Pa conocer en fondura esta esperiencia, tuvimos falando con Jorge López Vega, encargáu dende va 10 años d'acompañar y empobinar a la mocedá no qu'en bien de casos supón un pasu definitivu p'hacia la vida adulta.
La esperiencia de Giffoni

Cada añu, Jorge López Vega acompaña a 3 o 4 xixoneses d'ente 15 y 17 años, pa formar parte del xuráu del Festival de Giffoni, formáu namás por neños y neñes y mocedá del mundu enteru. En 2013 Celia, Andrés y Lucía xuntáronse a esta comunidá dempués de superar el casting" d'esti añu. El contautu con persones de la so edá de tol mundu (la llista de países participantes ye interminable, dende Irán a Turquía, Alemaña o la India, EEXX, Venezuela, Suráfrica) fai d'estos 11 díes, los más memorables de les sos vides, onde hai momentos pa la cultura, el pensamientu críticu, l'amistá, l'amor... Les películes pasen a ser asina una sida pa comunicase, pa espresase, pa sentise comprendíu. Jorge rellata qu'esti añu foi especialmente emocionante. La ganadora foi la película holandesa "Regret!" de Dave Schram, na que se cuenta la vida d'un rapaz al que faen "bulling" , y la proyeición remató con una gran ovación y el públicu qu'atarraquitaba de pie na sala "Truffault" de la nueva "Citadella del Cine". Na charra posterior col direutor y el protagonista de la película, una de les componentes del xuráu púnxose de pies y espunxo qu'ella taba pasando esactamente la mesma situación. La corriente d'empatía que s'espertó ente lo asistentes ye un exemplu de como l'arte puede camudar vides. El protagonista baxó del escenariu pa fundise nun abrazu cola moza que lloraba esconsolada, lo qu'arrincó la mayor ovación del públicu.

Tocante a los sos gustos cinematográfiquo, Jorge señala que la xente mozo aveza votar películes que dempués son galardonaes n'otros festivales con xuráu adulto". Son quien a prindar la calidá de les películes, de los sos actores y la fondura de los mensaxes que quieren tresmitir siempre al traviés del prisma de la so edá, pero con unos xuicios críticos qu'abluquen pola so madurez.

Demientres los díes del festival, la mocedá agospia en casa de los sos hermanos italianos" con más de 800 families de la zona. Jorge destaca l'adopción dafechu" que se da ente la xente mozo y les sos nueves families y l'altruismu d'estes abriendo de par en par la so casa pa facer posible esti suañu.

Per otru llau, los xóvenes esperimenten lo que ye movese pel mundu ensin los pas. Per primer vegada son responsables de les sos coses, los sos horarios, el so comportamientu. Los idiomes pasen a ser una prioridá pa ellos. Saber espresase n'inglés ye un requisitu pa poder ser xuráu en Giffoni, pero munchos d'ellos terminen amás con un nivel bien aceptable d'italianu. La vida nun vuelve ser lo mesmo cuando esfrutes una esperiencia d'esta mena, comenta Jorge empixáu.

Esta conviértese asina nuna aventura de maduración personal que los camuda, que-yos abre los güeyos y los fai tolerantes ya independientes. Pa munchos supón el pasu definitivu ente la infancia y l'edá adulto, lo que nun dexa de sorprender a esti profesor de secundaría. Jorge describe asina'l so llabor "Yo namái coordino y faigo tolo que puedo por que seya la meyor esperiencia de les vides de los y les moces que nella participen añu tres d'añu. El cine sigue paeciéndome daqué máxico y...TO BE CONTINUED."


Historia del Festival de Giffoni
El Festival de Cine de Giffoni naz nel añu 1971 nesta pequena localidá de casi 10.000 habitantes asitiada na zona de Salerno. Naz d'una idea del direutor artísticu Claudio Gubitosi y un grupu d'amigos del cine que decidieron centralo nel cine pa neños y neñes. Crearon asina una organización ensin ánimu d'arriquecimientu, coles mires de promover películes que pol so llinguaxe, estilu, historia y temática, tán destinaes a un públicu nuevo y familiar.

Demientres la década de 1970 el festival ábrese a la producción cinematográfica del norte d'Europa y la Unión Soviética, faciendo llegar al so «xuráu en pantalones curtios» les fábules ruses o llargumetraxes alemanes y escandinavos, empezando a llamar l'atención y espertar l'interés de periodistes y productores.

Na década de 1980 Gubitosi, ideólogu y direutor d'esta increíble esperiencia, apostó por espertar les cabeces pensantes» del so públicu, buscando per tol mundu películes que reflexaren «los petites, medranes y suaños, la congoxa y la fuerza d'una xeneración concebida ente les povises de los grandes movimientos culturales y sociales de los sesenta y los setenta». La década acabó afitando al festival internacionalmente, cola presencia de grandes estrelles del mundu del cine, como François Truffaut (quien llegó a afirmar que se trataba del «festival más necesariu del mundu»), Robert De Niro, Sergio Leone, Michelangelo Antonioni o Alberto Sordi.

Pela década de 1990 el Festival creció y estremóse en tres categoríes: First Screen (de 9 a 12 años), Free to Fly (de 12 a 14) y Finestra sul Cortile (15-19). En 1997 punxeron en marcha los Movie Days, xornaes suplementaries de cine, animación y discutiniu n'escueles de distintes ciudaes d'Italia que buscaben ampliar l'audiencia, llendada por fuerza nes xornaes del Festival. Tamién se punxo la primer piedra de la Ciudadela del Cine, el Giffoni Multimedia Valley, una área dedicada a la creatividá y la cultura audiovisual y al estudiu de nueves formes d'espresión artística.

A partir del añu 2001 creóse la Giffoni World Alliance, una rede de festivales en tol mundu, esportando'l conceutu del Giffoni Filme Festival primero a Berlín, depués a Miami (col Next Xen Filme Festival),Polonia y Albania. En 2005 celebróse tamién n'Australia, onde en 2007 se creo l'asociación Giffoni-Australia. Tamién en 2005 empecipiáron les ediciones del Giffoni Hollywood Filme Festival, entamáu por Steven Paul (presidente de la productora independiente Cristal Sky) y l'actor Jon Voight, que na edición de 2007 tuvo la so clausura nel célebre Teatru Kodak, sede de la ceremonia d'entrega de los Premios Óscar.

Dende 2003 el Giffoni collabora col Festival Internacional de Cine de Xixón y el Conseyu de la Mocedá de Xixón nel intercambéu de xuraos d'ente 13 y 17 años d'edá, unviando cuatro nuevos asturianos pa formar parte del xuráu de les seiciones Generator +13 y Generator +16.