Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Jean-François Laguionie "va animar" cola so filmografía'l Festival de Cine de Xixón

Votos

(Total de votos recibidos 125)

(Puntuación 2,98)

laguionie
El ciclu va amosar gran parte de la obra d'esti xenial direutor francés, na so mayoría inédita n'España.
El Festival de Cine de Xixón, fiel a la so esencia orixinal, va dedicar ún de los sos ciclos al renomáu direutor d'animación francés, Jean-François Laguionie. El públicu de la cita xixonesa va poder esfrutar de los sos cuatro llargumetraxes y del curtiumetraxe "La traversée de l'Atlantique à la rame" qu'en 1978 llanzólu a la fama tres ganar la Palma d'Oru al meyor curtiu nel Festival de Cannes y dempués el César de l'Academia de Cine francesa na mesma categoría. Les otres cuatro obres que completen esta retrospeutiva son los sos llargumetraxes "Gwen le livre de sable" (1995), premiáu nos Festivales de Annecy y Los Angeles, "Chateau des singes" (1999), "L'íle de Black Mor" (2004) y el so caberu trabayu "Le tableau" (2011), película pola que tamién foi candidatu a los premios César na categoría de meyor película d'animación.

A lo primero centráu nel teatru, Jean Françoise Laguionie (1939), adientróse nel mundu l'animación tres conocer a Paul Grimault, ún de los animadores franceses más nomaos de la historia. L'academia francesa entregó-y a Grimault un César d'honor en 1989, amás de llograr el premiu especial del xuráu del Festival de Venecia en 1952 cola so "La bergère et le ramoneur". Laguionie y Grimault caltuvieron una estrecha amistá, de fechu Grimault produxo los tres primeros curtios de Jean-François, pero poques vegaes trabayaron xuntos.

Esti direutor, productor, escritor y guionista forma parte d'una destacada xeneración d'animadores franceses, a la que pertenez tamién el so collaciu Michel Ocelot, creador de la renomada saga de películes de Kirikou u otres obres, como la recordada "Azur et Asmar". Tala yera l'amistá que'l primer curtiumetraxe de Michel, "Les 3 inventeurs", pol que ganó un premiu BAFTA, rodóse en casa de Laguionie.

Con una filmografía distinguida por bayura de festivales internacionales como Annecy, Varsovia o Chicago. Na so 51ª edición, el Festival Internacional de Cine de Xixón dedíca-y un merecíu ciclu que va convertir a la ciudá asturiana nun puntu de referencia pa tolos amantes de l'animación; un xéneru que tien verdaderes xoyes pero que, en munchos casos por mor del rabión d'estrenos de grandes producciones, filmografíes d'otros autores, inclusive vinientes de países tan destacaos como Francia, o pasen desapercibíes o a cenciellamente nun lleguen a les nuestres pantalles. Esti ye'l casu de la obra de Laguionie, ún de los animadores europeos más grandes de les caberes décaes.

Con esta premisa, Xixón álzase como una ventana abierta al mundu, ufiertando a tolos espectadores estes obres maestres, d'otru mou difíciles de ser esfrutaes en pantalla grande.

El festival Internacional de Cine de Xixón va celebrase ente'l 15 y el 23 de payares.
El Festival Internacional de Cine de Xixón ta entamáu pol Teatru Xovellanos, sofitáu pol Ministeriu d'Educación, Cultura y Deporte, el Programa Media, el Principáu d'Asturies y Liberbank. Collabora Coca-Cola.